काठमाडौं, अभियन्ता आशिका तामाङ लामो हिरासतपछि आज धरौटीमा रिहा भएकी छिन्। काठमाडौं र भक्तपुर प्रहरी हिरासतमा गरी २४ दिन बिताएकी तामाङलाई जिल्ला अदालत भक्तपुरले २० हजार धरौटीमा छाड्न आदेश दिएको हो।
उनी दुई घटनाक्रमका कारण प्रहरी हिरासतमा परेकी थिइन्। पहिलो घटनामा पशुपति विकास कोषमा अभद्र व्यवहार गरेको आरोपमा माघ २ गते काठमाडौं प्रहरीले पक्राउ गरेको थियो। त्यसपछि माघ १४ गते १० हजार धरौटी बुझाएर छुटेकी तामाङलाई तत्कालै भक्तपुर प्रहरीले नियन्त्रणमा लिएको थियो।
दोस्रो घटनामा काठमाडौं-भक्तपुर सीमानाको साँगास्थित झोलुंगे पुलमा स्थानीय निकायले गरिरहेको कर सङ्कलनको विरोध गर्दा आपराधिक उपद्रवको आरोप लागेको थियो। सूर्यविनायक नगरपालिकाको उजुरीपछि उनलाई पक्राउ गरिएको थियो।
