न्युज डेस्क / एचकेनेपाल डट कम –
हङकङ, २७ जुलाई। आइतबार बिहान हङकङको एक होटलबाट एक पुरुष खसेपछि त्यही होटलको कोठामा एक महिला र दुई बालबालिकाको शव फेला परेको छ।
प्रहरीका अनुसार चुन वाह स्ट्रिटमा अवस्थित पाण्डा होटलको कोठाबाट खसेका पुरुषलाई फेला पारिएको थियो। प्रहरीले बताएअनुसार बिहान ४:४५ बजे पुरुषका एक आफन्तले प्रहरीमा खबर गरेका थिए। ती पुरुष भावनात्मक भएर आत्महत्याको धम्की दिएपछि आफन्तले परिवारको बारेमा चिन्ता व्यक्त गरेका थिए।
प्रहरीले होटल पुग्दा ४० वर्षीया महिला र ३ र ६ वर्षका दुई बालकको शव फेला पारेको छ। पुरुष, महिला र बालबालिकाबीचको सम्बन्ध प्रहरीले खुलाएको छैन।
प्रहरीका अनुसार तीनैजना अचेत अवस्थामा थिए र शरीरमा रगतका दागहरू देखिएका थिए। महिला र दुई बालबालिकालाई घटनास्थलमै मृत घोषित गरिएको थियो।
पुरुषलाई चुन वानस्थित यान चाई अस्पतालमा भर्ना गरिएपछि मृत घोषित गरिएको छ। प्रहरीले घटनाबारे अनुसन्धान जारी रहेको जनाएको छ। १,०२६ कोठा भएको यो होटल चुन वानको सबैभन्दा ठूलो होटल हो।
