पोखरा, कास्कीको अन्नपूर्ण गाउँपालिका–१० का वडाध्यक्ष गौतम गुरुङले घान्द्रुकको मौलिकतासँगै संस्कृति संरक्षण गर्नुपर्नेमा जोड दिए।
घान्द्रुक पर्यटन व्यवस्थापन समितिको तेस्रो वार्षिक साधारण सभा तथा दोस्रो अधिवेशनको उद्घाटनपछि बोल्दै वडाध्यक्ष गुरुङले विकाससँगै फेरिँदै गएको मौलिकताबारे पर्यटकहरूमा चिन्ताको विषय बनेको बताए।
‘घान्द्रुकको पहिचान भनेको ढुङ्गेनी गाउँ हो। पछिल्लो समय विकासको गतिसँगै फेरिँदै जान थालेको मौलिकताले पर्यटन क्षेत्रमा गरेको असरबारे चिन्ताको विषय बनेको छ’, वडाध्यक्ष गुरुङले भने, ‘विकाससँगै घान्द्रुकको पहिचान संरक्षण गर्ने कर्तव्य हामी सबैको हो। मौलिकता संरक्षणलाई ध्यान दिँदै गाउँपालिकाले अबको आर्थिक वर्षदेखि अनुदानको समेत व्यवस्था गर्दै छ।’
वडाध्यक्ष गुरुङले पर्यटन व्यवसायलाई थप व्यवस्थित गर्न सबैले व्यवसाय दर्ता र बीमा गरी सञ्चालन गर्न समेत आग्रह गरे। ‘हामीले सबैले व्यवसाय गर्दा दर्ता र बीमा अनिवार्य गर्नुपर्छ’, उनले भने, ‘व्यवसाय दर्ता गरी सञ्चालन गर्दा राज्यले पनि उचित अनुदानसँगै सेवा सुविधा प्रदान गर्छ।’
रोधी क्लब कोँड घान्द्रुकका अध्यक्ष लक्षिण गुरुङले घान्द्रुकमा पर्यटन प्रवर्द्धन गर्नका लागि सबै एकजुट भएर अगाडि बढ्न आवश्यक रहेको बताए।
तमु प्ये ल्हु संघ घान्द्रुक इकाई समितिका अध्यक्ष प्रेम गुरुङले शान्ति, एकता र मेलमिलापबाट घान्द्रुकको पर्यटन प्रवर्द्धनमा महत्त्वपूर्ण भूमिका निर्वाह गर्ने उल्लेख गरे।
घान्द्रुक पर्यटन व्यवस्थापन समितिको तेस्रो वार्षिक साधारण सभा तथा दोस्रो अधिवेशनको अवसरमा चालु आर्थिक वर्ष २०८२/०८३ मा समितिलाई नेपाली पाहुनामार्फत सबैभन्दा बढी शुल्क बुझाउने वर्ल्ड भिलेजका सञ्चालक अमृतप्रसाद गुरुङ र गाइड पोर्टरमार्फत सबैभन्दा बढी शुल्क बुझाउने होटल बृज गेस्ट हाउसका सञ्चालक सुवास गुरुङलाई सम्मान गरिएको थियो।
यसैगरी घान्द्रुक पर्यटन व्यवस्थापन समिति र रोधी क्लब कोँड घान्द्रुकको संयुक्त आयोजनामा गत फागुन ६ देखि ९ गतेसम्म आयोजना गरेको घान्द्रुक पर्यटन महोत्सव १२ लाख रुपैयाँ बचत गर्न सफल भएको छ।
घान्द्रुक पर्यटन व्यवस्थापन समितिको सक्रियतामा घान्द्रुक चक्रीय पदमार्ग, बसपार्क लगायत विभिन्न स्थानमा सीसी क्यामेरा, विद्युत् पोलमा लाइट, फोहोर संकलन केन्द्र, बालचेन पार्क निर्माणसँगै आमासमूह लगायत विभिन्न संघसंस्थाहरूलाई सहयोग गर्दै आएको छ।
नवनिर्वाचित अध्यक्ष विक्रम गुरुङले घान्द्रुकमा आन्तरिक तथा बाह्य पर्यटकहरूको बसाइ लम्ब्याउन थप पर्यटकीय गन्तव्य निर्माणमा ध्यान पुर्याउने प्रतिबद्धता जनाए। ‘अघिल्लो कार्यकालमा केही अपूरा कामहरू बाँकी छन्, त्यसलाई पूर्णता दिन सक्रिय रूपमा लाग्नुपर्ने छ’, उनले भने, ‘घान्द्रुकमा पर्यटकको बसाइ लम्ब्याउन थप गन्तव्यको पहिचान र प्रवर्द्धन गर्न समेत आवश्यक छ।’
अध्यक्ष गुरुङले घान्द्रुकमा १३५ भन्दा बढी होटल तथा सामुदायिक होमस्टे सञ्चालनमा रहेको बताए। घान्द्रुकमा एक दिनमा २५०० पर्यटक राख्न सक्ने क्षमता रहेको छ।
घान्द्रुकबाट भैंसीखर्क–टाडापानी वनठाटी–देउराली हुँदै म्याग्दीको घोडेपानी र घान्द्रुक हुँदै टाडापानी–इसरु–दोबाटो–मुल्डे हुँदै म्याग्दीको खोर्पा लेक र हिडन लेक जान सकिन्छ भने घान्द्रुक, छोम्रोङ हुँदै अन्नपूर्ण बेस क्याम्पसमेत जान सकिन्छ।
