काठमाडौं, नेपाली खेलकुदको प्रतिष्ठित ‘एनएसजेएफ पल्सर स्पोर्ट्स अवार्ड २०८२’ को चार विधाको मनोनयन सार्वजनिक गरिएको छ।
नेपाल खेलकुद पत्रकार मञ्च (एनएसजेएफ) को खेलाडी छनोट समितिले आइतबार आयोजना गरेको मनोनयन घोषणा कार्यक्रममा अवार्डको २३औं संस्करणको वर्ष उत्कृष्ट पुरुष खेलाडी, वर्ष उत्कृष्ट महिला खेलाडी, वर्ष उत्कृष्ट युवा खेलाडी र वर्ष उत्कृष्ट प्रशिक्षक विधामा ५-५ जनाको मनोनयन सार्वजनिक गरेको हो।
वर्ष उत्कृष्ट पुरुष खेलाडीको मनोनयनमा बक्सिङका चन्द्र थापा, एथ्लेटिक्सका सोमबहादुर कुमाल, करातेका प्रदीप बैजाली मगर, क्रिकेटका दीपेन्द्रसिंह ऐरी र गल्फका सद्भाव आचार्य परेका छन्। त्यस्तै वर्ष उत्कृष्ट महिला खेलाडीको मनोनयनमा करातेका एरिका गुरुङ, सबिना श्रेष्ठ र सानुमाया थिङ तथा एथ्लेटिक्सकी सन्तोषी श्रेष्ठ र फुटबलकी साबित्रा भण्डारी मनोनित भएका छन्।
यसैगरी वर्ष उत्कृष्ट युवा खेलाडीको मनोनयनमा बक्सिङका अर्पिल राना, करातेका रेहान जाबेद र मनिषा कुमारी बोहोरा तथा चेसका पुरुषोत्तम सिलवाल र क्रिकेटका रौनक श्रीवास्तव समावेश भएका छन्। वर्ष उत्कृष्ट प्रशिक्षकतर्फ बक्सिङका दीपक महर्जन, करातेका कुशल श्रेष्ठ र मण्डेकाजी श्रेष्ठ, क्रिकेटका स्टुआर्ट ल र नेत्रहीन महिला क्रिकेटका पुरन सिंह खत्री मनोनयनमा रहेको मञ्चले आज आयोजना गरेको कार्यक्रममा जानकारी दिइएको छ।
२३औं संस्करणको अवार्ड भदौ १८ गते प्रदर्शनीमार्गस्थित नेपाल पुलिस क्लबको ब्लु पभेलियनमा आयोजना हुँदै छ। वर्ष पुरुष, महिला, युवा, पिपल्स च्वाइस र वर्ष प्रशिक्षकका विजेताले पल्सर मोटरसाइकल प्राप्त गर्नेछन्। २०८२ सालभित्र अन्तर्राष्ट्रिय स्तरमा गरेको प्रदर्शन र नतिजा नै छनोटको मुख्य आधार रहेको मञ्चका सचिव तथा खेलाडी छनोट समितिका संयोजक अनिल मल्ल ठकुरीले जानकारी दिए। उक्त समितिमा निरञ्जन राजवंशी, हिमेशरत्न बज्राचार्य, प्रजित शाक्य र विराटजंग रायमाझी सदस्य रहेका छन्।
घोषणा कार्यक्रममा एआइपिएस एसियाका कोषाध्यक्षसमेत रहेका छनोट समितिका सदस्य राजवंशीले देशमा आएको विनाशकारी बाढी तथा प्राकृतिक प्रकोपको विषम परिस्थितिमा मानवीय क्षतिप्रति समवेदना व्यक्त गर्दै २३औं संस्करण आयोजना गर्न लागिएको बताए। देश पीडामा रहेको बेला अवार्डलाई ठूलो उत्सवका रूपमा नमनाई खेलकुद क्षेत्र र खेलाडीका तर्फबाट साथ दिनु नै अवार्डको वास्तविक सन्देश हुने उनले स्पष्ट पारे।
नेपाल खेलकुद पत्रकार मञ्चले २०६० सालदेखि यो अवार्ड निरन्तर आयोजना गर्दै आएको छ। यसपटक पनि कुल ९ विधामा खेलाडी तथा खेलकर्मीलाई सम्मानित गरिँदै छ।
तीमध्ये पिपल्स च्वाइस विधाको मनोनयनमा फुटबलकी पूजा राना, भलिबलकी मीना सुनार, करातेकी सानुमाया थिङ, मिक्स मार्सल आर्ट्सका रवीन्द्र ढाँट र क्रिकेटका शेर मल्ल छन्। अन्य विधाहरू—लाइफटाइम एचिभमेन्ट, पारा एथलिट, स्पेसल र एसियन स्पोर्ट्स जर्नालिस्ट अवार्डका विजेताको घोषणा भदौ १८ गते नै गरिनेछ। यी विधाका विजेता तथा सम्मानित व्यक्तिलाई जनही १ लाख रुपैयाँ प्रदान गरिनेछ।
एनएसजेएफ पल्सर स्पोर्ट्स अवार्डको मुख्य प्रायोजक गोल्छा ग्रुप रहेको छ भने नासा सेक्युरिटिज सहप्रायोजकका रूपमा रहेको छ। सहप्रायोजकहरूमा सूर्य नेपाल प्रालि, आइएमई बाइ खल्ती, रोयल सिंगी होटल, केल्मी, इमेजिङ, प्लाजा होटल ग्रुप, इम्बार्क कलेज रहेका छन्। सहयोगी संस्थाका रूपमा राष्ट्रिय खेलकुद परिषद्, नेपाल ओलम्पिक कमिटी र बाग्मती प्रदेश खेलकुद विकास परिषद् रहेका छन्।
