पोखरा, २१ भाद्र। पोखरेली टेनिस स्टार खेलाडी अभिषेक बास्तोलाले नेपाली टेनिसमा अर्को इतिहास रच्दैछन्।
उनी एटीपी च्यालेन्जर ट्रफी खेल्ने भएका छन् । यो प्रतियोगिता खेल्न अभिषेक नेपालका पहिलो टेनिस खेलाडी हुन् । ७ देखि १३ सेप्टेम्बरसम्म भियतनामको फान थिएटस्थित नोभा वर्ल्डको हार्ड कोर्टमा उक्त च्यालेन्जर ट्रफी हुनेछ।
वाइल्ड कार्डबाट प्रवेश पाएका अभिषेकले क्वालिफायरमा जापानी खेलाडी युता कावाहासीविरुद्ध खेल्नेछन्।
कुल ६३ हजार अमेरिकी डलर पुरस्कार राशिको एटिपी च्यालेन्जरमा नेपालको प्रतिनिधित्व गर्न पाउनु नेपाली टेनिस र आफ्नो लागि ऐतिहासिक उपलब्धि भएको अभिषेकले बताए।
जापानमा हुने २० औँ एसियाली खेलकुदको तयारीको रूपमा अभिषेकले विभिन्न देशमा भएका प्रतियोगिता खेलिरहेका छन् । सम्भवतः यो प्रतियोगितापछि उनी अर्को एक अन्तर्राष्ट्रिय प्रतियोगितामा सहभागी हुनेछन् । त्यसपछि उनी एसियाडका लागि जापान जाने छन्।
एसियाडमा अभिषेकको चौथो सहभागिता हो । यसपटकको एसियाडमा केही फरक र उत्कृष्ट प्रदर्शन दिने अभिषेकले अपेक्षा लिएका छन्। उनले आफ्नो यसपटकको एसियाड सहभागितालाई प्रदर्शनको हिसाबले फलदायी बनाउने बताए।
पछिल्लो समय उनले विभिन्न प्रोफेसनल टुरमा राम्रो सफलता पाइरहेका छन्। त्यसले पनि यो एसियाडमा नेपालको तर्फबाट उत्कृष्ट प्रदर्शन गर्ने बाँस्तोलाको भनाइ छ।
