काठमाडौँ, ९ असोज । जल तथा मौसम विज्ञान विभागले असोज ९ देखि ११ गतेसम्म देशका अधिकांश भूभागमा भारीदेखि अति भारी वर्षाको प्रक्षेपण गरेपछि देशभर उच्च सतर्कता अपनाइएको छ।
बंगालको खाडीमा विकसित भएको न्यून चापीय प्रणालीका कारण बाढी, पहिरो र डुबानको जोखिम बढेपछि शिक्षा, विज्ञान तथा प्रविधि मन्त्रालयको आग्रहमा स्थानीय तहहरूले विद्यालय बन्द गर्न थालेका छन्।
जोखिमलाई दृष्टिगत गर्दै पोखरा महानगरपालिका र विराटनगर महानगरपालिकाले आफ्ना मातहतका सम्पूर्ण सामुदायिक तथा संस्थागत विद्यालयहरू दुई दिनका लागि बन्द गर्ने निर्णय गरेका छन्।
पोखरा महानगरपालिकाका मेयर धनराज आचार्यले मौसम विभागको चेतावनी र विद्यार्थीहरूको सुरक्षालाई ध्यानमा राख्दै असोज ८ र ९ गते (बिहीबार र शुक्रबार) दुई दिन स्थानीय बिदा दिई शिक्षण संस्था बन्द गर्न निर्देशन दिएका हुन्।
यता विराटनगर महानगरपालिकाको शैक्षिक प्रशासन महाशाखाले पनि नदी तथा खोलाहरूमा जलस्तर बढ्न सक्ने, सडक र बस्तीहरू डुबानमा पर्न सक्ने खतरा औंल्याउँदै दुई दिनका लागि विद्यालय बन्द गरिएको जनाएको छ।
महानगरहरूले जोखिमको समयमा विद्यालयका भवनहरूलाई आवश्यक परेको खण्डमा अस्थायी आश्रयस्थल (सेल्टर) का रूपमा प्रयोग गर्न मिल्ने गरी तयारी अवस्थामा राख्न समेत विद्यालय प्रशासनलाई आग्रह गरेका छन्।
मौसम पूर्वानुमान महाशाखाले विशेष बुलेटिन जारी गर्दै सुदूरपश्चिमका हिमाली तथा पहाडी जिल्लाहरू दार्चुला, बझाङ र बाजुरामा बाढी-पहिरोको अति उच्च जोखिम (रेड अलर्ट) रहेको जनाएको छ।
वर्षाका कारण पहाडी राजमार्गहरूमा पहिरो जान सक्ने र यातायात ठप्प हुन सक्ने भएकाले राष्ट्रिय विपद् जोखिम न्यूनीकरण तथा व्यवस्थापन प्राधिकरणले असोज ९ देखि ११ गतेसम्म अत्यावश्यक कामबाहेक रात्रिकालीन समयमा सवारी साधन सञ्चालन नगर्न कडा निर्देशन दिएको छ।
यस्तै, हिमाली क्षेत्रमा पदयात्रा (ट्रेकिंग) र पर्वतारोहणका सम्पूर्ण गतिविधिहरू तत्कालका लागि स्थगित गर्न अपिल गर्दै सरकारले खोज तथा उद्धारका लागि नेपाली सेना, नेपाल प्रहरी र सशस्त्र प्रहरी बलका विपद् व्यवस्थापन टोलीहरूलाई आवश्यक बन्दोबस्तीका सामग्रीसहित ‘हाई अलर्ट’ मा राखेको छ।
