हङकङमा लाइसेन्स नभएका रेस्टुरेन्टबाट ३५ केजी संदिग्ध बिरालो र कुकुरको मासु बरामद, ४ नक्कली भियतनामी शरणार्थी पक्राउ

न्युज डेस्क / एचकेनेपाल डट कम –
हङकङ, १ मार्च। मोङ कोकमा लाइसेन्स नभएका रेस्टुरेन्टबाट ३५ किलोग्राम संदिग्ध बिरालो र कुकुरको मासु बरामद गरिएको छ। साथै प्रहरीले ४ जना नक्कली भियतनामी शरणार्थीलाई पक्राउ गरेको छ।

मोङ कोकको सांघाई स्ट्रिटमा कुकुर र बिरालोलाई खानाको रूपमा प्रयोग गरेको आशंकापछि कृषि, मत्स्यपालन तथा संरक्षण विभागले खाद्य तथा वातावरण स्वच्छता विभाग र कानुन कार्यान्वयन गर्ने निकायसँग हिजो विहीवार संयुक्तरुपमा छापा मारेको थियो।

छापापछि खानाका रूपमा प्रयोग हुने आशंकामा करिब ३५ किलो कुकुर र बिरालोको मासु बरामद गरेको छ। प्रयोगशालामा परीक्षणपछि नतिजा आउने जनाएको छ।

यदि बिरालो वा कुकुरको मासु भएको प्रमाणित भएमा संलग्न व्यक्तिलाई कारबाही गरिनेछ। कृषि, मत्स्यपालन तथा संरक्षण विभागले खानामा कुकुर र बिरालोको मासु प्रयोग गर्न नदिने र कानूनको कडाइका साथ पालना गरी कारबाही गर्नेमा जोड दिएको छ।

यो बुझिएको छ कि अफिसरहरूले एक ५० वर्षीय शरणार्थीको पहिचान कागजात बोकेका भियतनामी व्यक्तिलाई मोङ कोकको एक भवनको माथिल्लो तलामा कुकुरको मासु बेचिरहेको भेट्टाएका थिए। जबकि दुई पुरुष र एक महिला (१६ देखि ४३ वर्ष) ले समेत कुकुरको मासु बेच्दै गरेका भेटाएका थिए ।

स्थानीय मिडियाका अनुसार अधिकारीहरूले एकाइमा छापा मारेर शंकास्पद जमेको कुकुर र बिरालाको मासु, खाना पकाउने भाँडा र भियतनामी बयानहरू सहितको खानाको मेनु बरामद गरेका छन्। मेनुमा कुकुर र बिरालोको मासु बिक्रीको लागि पनि सूचीबद्ध गरिएको छ। अनुसन्धानपछि चारै जनालाई पक्राउ गरिएको हो।

पक्राउ परेका मध्ये एकले ग्राहकलाई आकर्षित गर्न सामाजिक सञ्जालमा खाता खोलेको र यस वर्षको जनवरीमा सुँगुरको मासु, सुँगुर, गाईको मासु, कुखुरा, हाँस, झिंगा, क्र्याब र समुद्री खानालगायत भियतनामी परिकारका धेरै तस्विर पोस्ट गरेको बताइएको छ।

एउटा तस्बिर पूरै भुटेको कुकुर र अन्य परिकारको तस्बिर भएको आशंका गरिएको छ।

हङकङमा बिराला र कुकुर नियमावली (क्याप. 167A) अनुसार कुनै पनि व्यक्तिले खानाको लागि कुकुर वा बिरालोलाई मार्न पाइदैन। चाहे त्यो मानव उपभोगको लागि होस् वा होइन; न त उसले कुकुरको मासु वा बिरालोको मासु बेच्न वा प्रयोग गर्न वा अरूलाई बेच्न वा प्रयोग गर्न दिनेछैन।

बेचविखान गरिएको पाइएमा अपराधीलाई हङकङ डलर ५ हजारसम्म जरिवाना र ६ महिनाको लागि जेल सजाय हुन सक्छ।