पोखरा, पोखराबाट काठमाडौंतर्फ जाँदै गरेको पर्यटक बसमाथि ढुङ्गा प्रहार गरी पाँच विद्यार्थीलाई घाइते बनाएको आरोपमा तीन जनालाई प्रहरीले पक्राउ गरेको छ।
जेठ १८ गते राति साढे ११ बजेतिर पोखरा महानगरपालिका वडा नं. १४ चाउथेमा भएको घटनामा नेपाल कलेज अफ इन्फरमेशन टेक्नोलोजी बालकुमारी ललितपुरका भ्रमणमा आएका विद्यार्थीहरू सवार बा १ प ९१६ नंको बसमाथि ढुङ्गा प्रहार भएको थियो।
प्रहरीका अनुसार पक्राउ पर्नेहरूमा बस चालक तिलक बहादुर थापामगर (४८), सह-चालक मान प्रसाद खरेल (३०) र ग्यारेजमा काम गर्ने राजेश मरट्टा (२८) रहेका छन्। घाइते विद्यार्थीहरूको अन्नपूर्ण अस्पतालमा सामान्य उपचारपछि डिस्चार्ज गरिएको छ।
कास्की जिल्ला अदालतबाट आपराधिक उपद्रव गर्न नहुने कसूरमा ६ दिनको म्याद थप गरी थप अनुसन्धान भइरहेको जिल्ला प्रहरी कार्यालय कास्कीले जनाएको छ।
