भक्तपुर। आइतबार साँझ नौ बज्दै थियो, चाँगुनारायण नगरपालिका–७ तपादम्फो (हेल्मेड डाँडा) को खुल्ला क्षेत्रमा चिसो उत्तिकै बढेको थियो । चिसोको पर्वाह नगरी हजारौँ दर्शक गायक स्वर्गीय बुद्धिकृष्ण लामिछाने साँझ–२०८२ को रौनकतामा झुमिरहे।
भारतीय चर्चित गायक आर्को मुखर्जीले ‘पिँढीमा बसेर मेरै बाटो हेरेर मेरी आमा रुँदी हुन्, मलाई सम्झेर’ बोलको गीतलाई रिमिक्समा गाउँदा हजारौँ दर्शकहरू नाचेका थिए ।
चाँगुनारायण नगरपालिकाले आइतबार सो कार्यक्रम आयोजना गरेको थियो । चाँगुनारायण नगरपालिका–७ मा २०१५ साल साउन १ गते जन्मेका लामिछानेको २०७५ साल पुस १३ गते निधन भएको थियो । चर्चित लोक गायक लामिछानेको आठौँ स्मृति दिवसका अवसरमा उनको योगदानको स्मरण गर्दै नगरपालिकाले स्वर्गीय बुद्धिकृष्ण लामिछाने साँझ–२०८२ आयोजना गरेको हो ।
कार्यक्रममा स्व लामिछानेको चर्चित गीतहरू ‘पिँढीमा बसेर, घाँस काट्ने खुर्केर आयो जोबन हुर्केर, गाई त बाँध्ने पाटको दाम्लो’ लगायतका दर्जनौँ गीत विभिन्न कलाकारहरूले प्रस्तुत गरेका थिए ।
भारतीय चर्चित गायक आर्को मुखर्जीको विशेष प्रस्तुतीले दर्शकलाई तानेको थियो । कार्यक्रममा ऐक्या हामी व्याण्ड, कोमल ओली, बिक्रम सुवाल, दोहोरी गायक सानु केसी, सविता ढुङ्गाना, कपिस कसपाल, सूर्यमणी आचार्य, सविना केसीलगायतका दर्जनौँ गायक गायिकाले स्व लामिछानेका र आफ्ना गीत गाए।
वागमती प्रदेशका मुख्यमन्त्री इन्द्र बानियाँले कार्यक्रमको उद्घाटन गर्दै कलाकार देशको गहना भएकाले उनीहरूको सम्मानलाई प्राथमिकतामा राख्नुपर्ने बताए।
चाँगुनारायण नगरपालिकाका प्रमुख जीवन खत्रीले नगरकोट भ्रमण वर्षको अवसर पारेर आफ्नै ठाउँका गायक बुद्धि कृष्ण लामिछानेको सम्झनामा आयोजित कार्यक्रमले उनको योगदानलाई जीवन्त राख्न टेवा पुग्ने बताए।
कार्यक्रममा स्व गायक लामिछानेको जीवनी समेटेर प्रकाशित पुस्तकको समेत विमोचन गरिएको थियो।
त्यसैगरी नगरपालिकाले स्व लामिछानेलाई मरणोपरान्त रु ५१ हजार नगद पुरस्कारसहित सम्मान गरेको छ । लामिछानेकी श्रीमती दुर्गादेवी लामिछानेलाई मुख्यमन्त्री बानियाँ र नगर प्रमुख खत्रीले दोसल्ला ओढाएर सम्मान पत्रका साथ ५१ हजारको चेक हस्तान्तरण गरे । ३० हजारभन्दा बढी दर्शकको उपस्थिति रहेको सांस्कृतिक साँझमा स्थानीय उत्पादन, खानाका परिकारका स्टल राखिएका थिए।
