पशन तमू र जगतअम्बु गुरुङ / एचकेनेपाल डट कम –
हङकङ, २६ जुलाई। हङकङ साहित्यिक साझा श्रृंखलाको आयोजनामा जानु काम्बाङकृत उपन्यास ‘खाम्योक’ को एक विशेष समारोहका बीच भव्य रूपमा लोकार्पण गरिएको छ।
जोर्डनस्थित एभरेष्ट रेष्टुरेन्टमा गत २६ जुलाई २०२२ का दिन उक्त विमोचन कार्यक्रम सम्पन्न भएको हो।
किरात चक्थुम चुम्लङ हङकङका अध्यक्ष र शमशेर तुम्बाहाङ्फेको प्रमुख आतिथ्यतामा सम्पन्न भएको उक्त कार्यक्रममा एनआरएनए हङकङकी अध्यक्ष अनु राई र डिस्ट्रिक्ट काउन्सिलर (याउ सिम मोङ डिस्ट्रिक्ट) अरुणा गुरुङ लगायतका व्यक्तित्वहरू विशेष अतिथिका रूपमा उपस्थित थिए।
संयोजक जुनु रानाको अध्यक्षतामा अघि बढेको सो समारोहलाई सह-संयोजक रोशन यक्सोले सञ्चालन गरेका थिए।
कार्यक्रमको सुरुवातमा सुनिता गिरीले स्वागत मन्तव्यद्वारा उपस्थित सम्पूर्णलाई स्वागत गरेका थिए भने टंक तुम्बाहाङ्फे, अनु राई, अरुणा गुरुङ र विभिन्न संघ-संस्थाका प्रतिनिधिहरूले कृतिको सफलताको कामना गर्दै शुभकामना मन्तव्य व्यक्त गरेका थिए।
साहित्यिक जमघट तथा विविध मनोरञ्जनात्मक गतिविधिहरू समेत समावेश गरिएको उक्त समारोहमा राजकुमार राई, बालिका बान्तवा, भूपेन्द्र चेम्जोङ र व्रजकुमार राई लगायतका स्रष्टाहरूले आ-आफ्नो प्रस्तुति तथा भनाइहरू राखेका थिए। हङकङमा रहेका विभिन्न संघ-संस्थाका प्रतिनिधि तथा साहित्यप्रेमीहरूको उत्साहजनक उपस्थितिले कार्यक्रम थप भव्य बनेको थियो।
