अबदेखि विदेशी राष्ट्रप्रमुखको स्वागत सैनिक मञ्चमा

सरकारले विदेशी राष्ट्रप्रमुख तथा सरकार प्रमुखको औपचारिक स्वागत अबदेखि सैनिक मञ्च टुँडिखेलमा गर्ने भएको छ ।

टुँडिखेलमै नेपाली सेनाले विदेशी राष्ट्रप्रमुख तथा सरकार प्रमुखलाई सम्मान गारत (गार्ड अफ अनर) अर्पण गर्ने खबर नागरिक दैनिकमा छ।

पाकिस्तानका प्रधानमन्त्री साहिद खाकान अब्बासी टुँडिखेलमा सम्मान गारत पाउने पहिलो अति विशिष्ट विदेशी पाहुना हुने भएका छन् ।

‘सोमबार पाकिस्तानका प्रधानमन्त्रीज्यूलाई सैनिकमञ्च टुँडिखेलमा औपचारिक स्वागत गरी सम्मान गारत दिने कार्यक्रम छ,’ नेपाली सेनाका प्रवक्ता गोकुल भण्डारीले भने, ‘यसअघि यस्तो स्वागत तथा सम्मान त्रिभुवन अन्तर्राष्ट्रिय विमानस्थालको अति विशिष्ट कक्षमा हुन्थ्यो।’