नवौं यलम्बरहाँङ रनिङशिल्ड फूटबल १६ अप्रिल २०१६ मा हुने

विश्वासदीप तिगेला / एचकेनेपाल डट कम –
फेल्थाम लण्डनमा किरात याक्थुङ चुम्लुङ युकेको बैठकले ऐतिहासिक नवौं यलम्बरहाँङ रनिङशिल्ड फूटबल प्रतियोगिता पूर्वनिर्धारित १६ अप्रिलकै दिन भब्यतापूर्वक सम्पन्न गर्ने निर्णय गरेको छ।

समर मौषमसंगै नेपाली समुदायमा फूटबल प्रतियोगिताको पनि शुरुवात हुने परम्परा अनुसार यस बर्षपनि यलम्बरहाँङ रनिङशिल्ड फूटबल फेल्थाम लण्डनमै हुने भएको छ । युकेका नेपाली समाजबाट हुने फूटबल प्रतियोगिताहरु मध्येको एक ठूलो खेल मानिने यस रनिङशिल्डलाई गत बर्ष जेडि ब्वाइज क्लवले नगद १ हजार पाउण्ड रासिको पुरस्कार र ट्रफि सहित चुमेको थियो । ब्वाइज क्लव संग एफसी युनाइटेडले फाइनल खेलखेलेको थियो र अनिल तामाङ म्यानअफ दी म्याच घोषित भएका थिए । गतबर्ष ३२ टिमहरु सहभागि थिए।

किरात प्रथम राजा यलम्बरको सम्मान तथा सम्झनामा रनिङशिल्ड फूटबल पहिलो पटक सन् २००८ अगष्ट ९ बाट शुरु गरिएको थियो । यो बर्ष प्रतियोगिताको नबौं संस्करण हो । राजा यलम्बरले ३७९५ बर्षअघि शासन शुरुवात गरेको इतिहासहरु प्राप्त भएका छन् । याक्खा, सुनुवार, राई, लिम्बु, जिरेल, सुरेल, थामी, धिमाल, हायु आदिले आफूहरु किरात भएको दावी गर्दै आएका भएपनि पुराना इतिहासको पुस्तकमा मगर र गुरुङलाई पनि किरात भनी उल्लेख गरेको पाइन्छ।