हङकङका विद्यार्थीमाथि हथौडा आक्रमण गरेका किशोरलाई आजीवन कारावास

न्युज डेस्क / एचकेनेपाल डट कम –
हङकङ, २० अक्टोबर। बेलायतको डेभनमा रहेको ब्लन्डेल्स स्कूलमा एक हङकङेली विद्यार्थीमाथि हथौडा आक्रमण गरेको आरोपमा १६ वर्षीय किशोरलाई आजीवन कारावासको सजाय सुनाइएको छ।

यो घटना जुन २०२३ मा भएको थियो, जसले प्रतिष्ठित बोर्डिङ स्कूल समुदायलाई स्तब्ध पारेको थियो।

९ जुन २०२३ को बिहानै भएको यस आक्रमणमा दुई छात्र र एक गृहप्रमुख गम्भीर घाइते भएका थिए। हङकङका १६ वर्षीय विद्यार्थीको टाउकोमा गम्भीर चोट लागेको थियो, जसका कारण उनी लामो समयसम्म अस्पतालमा भर्ना हुनुपर्‍यो र अझै पनि ठूलो मानसिक चुनौतीको सामना गरिरहेका छन्।

आरोपीले आफू निद्रामा हिँडेको दाबी गरे पनि, अदालतले उनको इन्टरनेट खोज इतिहासमा “स्कूल नरसंहार” र “बाल हत्यारा” जस्ता विषयहरू फेला पारेको थियो। जसले घटनाको पूर्वयोजना रहेको पुष्टि गर्छ। न्यायाधीशले घटनालाई “जंगली र पूर्व योजनाबद्ध” भनी वर्णन गरेका छन्।

विद्यालयका प्रधानाध्यापक बार्ट विलेंगाले यो एक एकल घटना भएको र विद्यालय सबै विद्यार्थीहरूको सुरक्षा सुनिश्चित गर्न प्रतिबद्ध रहेको बताएका छन्। यस बीच, पीडित हङकङेली विद्यार्थीको परिवारले सपोर्टका लागि धन्यवाद दिँदै उनको पूर्ण स्वास्थ्यलाभको आशा व्यक्त गरेको छ।