न्युज डेस्क / एचकेनेपाल डट कम –
हङकङ, १२ फेब्रुअरी। एसियाकी सर्वश्रेष्ठ महिला सेफको उपाधि जितेकी फिलिपिन्सकी प्रख्यात सेफ तथा रेस्टुरेन्ट व्यवसायी मार्गरिटा फोरेस हङकङको एक होटलको कोठामा मृत फेला परेकी छिन्।
६५ वर्षको उमेरमा निधन भएकी मार्गरिटाकी छोरा अमान्डोले फेब्रुअरी ११ तारिखका दिन सामाजिक सञ्जालमार्फत यो दुःखद समाचार सार्वजनिक गरेका हुन्।
मृत्यु हुनुभन्दा एक दिनअघि मात्र उनले सेन्ट्रलस्थित प्रिन्स एन्ड द पिकक नामक भारतीय रेस्टुरेन्टमा खाना खाएको तस्विर इन्स्टाग्राममा शेयर गरेकी थिइन्। मोरक्कोमा एक फेशन कार्यक्रममा सहभागी भएपछि उनी छोटो भ्रमणका लागि हङकङ आएकी थिइन्।
फोरेस फिलिपिनो खानाको प्रवर्द्धन र फिलिपिन्समा इटालियन खानाको विकासमा चर्चित थिइन्। उनी सिबो चेन, लुस्सो, ग्रेस पार्क र अल्टा लगायत धेरै रेस्टुरेन्टकी मालिक थिइन्।
सन् २०१६ मा उनलाई एसियाकी सर्वश्रेष्ठ महिला सेफको उपाधि प्रदान गरिएको थियो। इटालियन र फिलिपिनो खानाको अनौठो मिश्रण सिर्जना गर्ने उनको प्रतिभाको खाद्य जगतमा भरपूर प्रशंसा गरिन्थ्यो।
थाइरोइड क्यान्सरलाई दुई पटक जितेकी फोरेस “इन्स्पायर्ड विथ एना ओल्सन” र “कुलिनरी जर्नीज” जस्ता अन्तर्राष्ट्रिय टेलिभिजन कार्यक्रमहरूमा पनि देखा परेकी थिइन्।
यस दुःखद घडीमा खाद्य क्षेत्रका साथीहरू र शुभचिन्तकहरूले सामाजिक सञ्जालमार्फत श्रद्धाञ्जली व्यक्त गरिरहेका छन्। उनको पाकशास्त्रप्रतिको जुनून र प्रेरणादायी व्यक्तित्वले धेरैको जीवनमा गहिरो छाप छोडेको छ।
सिबोले फेसबुकमा लेखेको छ, “उनको न्यानो व्यवहार, सिर्जनशीलता र अडिग भावनाले हामी सबैलाई प्रेरित गरिरहनेछ। तपाईंको हृदय हामीसँग बाँड्नुभएकोमा धन्यवाद, सेफ मार्गरिटा। तपाईं सधैं सिबोमा रहनुहुनेछ।”
