एचकेनेपाल डट कम –
ताप्लेजुङ । ताप्लेजुङमा भएको एक दर्दनाक दुर्घटनामा चार जनाको ज्यान गएको छ । सोमबार बिहान पाथीभरा दर्शनका लागि जाँदै गरेको बोलेरो जिप विद्युत्को तारमा अल्झिएर आगलागी हुँदा चार जनाको मृत्यु भएको हो।
कोशी प्रदेश प्रहरी कार्यालयका अनुसार मृत्यु हुनेमा ललितपुर महानगरपालिका १० निवासी १६ वर्षीया आध्या आचार्य, झापाको भद्रपुर नगरपालिका १५ का ७० वर्षीय विनोद पौडेल र उनकी श्रीमती ६९ वर्षीया सरिता पौडेल तथा चालक ताप्लेजुङको फुङलिङ नगरपालिका १० का ४२ वर्षीय दुर्गा भट्टराई रहेका छन्।
फुङलिङ नगरपालिका-१० को सेवारो चोकमा भएको यस दुर्घटनामा मे १ च ३०११ नम्बरको बोलेरो जिप विद्युत्को पोलबाट लत्रिएको तारमा अल्झिएर आगो लागेको थियो । घटनामा परी ललितपुर महानगरपालिका १० की ४५ वर्षीया सबिना आचार्य र उनको १० वर्षीय छोरा भविमय आचार्य घाइते भएका छन्।
कोशी प्रदेश प्रहरी कार्यालयका प्रवक्ता एवं एसएसपी भीमबहादुर दाहालका अनुसार घाइतेहरूलाई तत्काल उपचारका लागि हेलिकप्टरमार्फत काठमाडौं लगिँदैछ । प्रहरी निरीक्षक रवि रावलको नेतृत्वमा १५ जनाको टोलीले घटनास्थलमा पुगी उद्धार कार्य गरेको र आगो पूर्णरूपमा नियन्त्रणमा लिइएको छ। प्रहरीले घटनाको थप अनुसन्धान गरिरहेको जनाएको छ।
