सगरमाथाको उचाइ कति ? घोषणा गर्न चीनसँग समन्वय हुँदै…

विश्वकै सर्वोच्च शिखर सगरमाथाको देश भनेर कहलिएको छ नेपाल। नेपालले सगरमाथाको उचाइ भने पहिलो पटक मापन गरेको छ।

हालसम्म नेपालले अरू नै देशले गरेको मापनलाई मान्दै आएको थियो।

सगरमाथा उचाइ मापन सचिवालयका संयोजक सुशील डंगोलले उचाइ नाप्ने काम सकिएको जानकारी दिए । ‘उचाइ घोषणाका लागि चीनसँग समन्वय भइरहेको छ’, सहसचिव डंगोलले भने । चीनसँग संयुक्त रूपमा उचाइ घोषणा गरिने उनको भनाइ छ। उनले नयाँ उचाइ कति भनेर खुलाएनन्।

नापी विभागले असार मसान्तभित्र अन्तर्राष्ट्रिय कार्यशाला गरी उचाइ घोषणा गर्ने तयारी गरेको थियो । तर, लकडाउनका कारण तथ्यांक प्रशोधन प्रभावित भयो । अब भने प्रशोधनसहित सम्पूर्ण काम सकिएको संयोजक डंगोलको भनाइ छ। अन्नपूर्ण पोस्टमा खबर छ।