उदयपुर, किरात बान्तावा रूङमाहाङ राई केन्द्रीय वात्तोङ कार्यसमिति (केवास) को ७औं राष्ट्रिय सम्मेलन २०८१ चैत्र १, २ र ३ गते उदयपुर जिल्लाको बसाहमा भव्य रूपमा आयोजना हुनेछ। यस सम्मेलनको मूल तयारी समिति र विभिन्न उपसमितिहरू गठन भइसकेको छ भने सम्मेलनलाई सफल बनाउन सबै इवास (इकाई वात्तोङ संघ) र क्षेवास (क्षेत्रीय वात्तोङ संघ) लाई सहभागिता बढाउन अनुरोध गरिएको छ।
सम्मेलनको प्रचार-प्रसारका लागि ब्रोसर र सर्कुलर सामाजिक सञ्जालमार्फत सबै इवासहरूलाई पठाइएको छ। तर, केही इवासहरूमा जानकारी अस्पष्ट भएकोले सम्बन्धित इवासहरूलाई २०८१ फागुन २५ गतेसम्म परिपत्रमा तोकिएको कामको विवरण मूल तयारी समितिमा पठाउन अनुरोध गरिएको छ।
सम्मेलनमा सहभागी हुने प्रतिनिधिहरूको संख्या वंशीय विधान बमोजिम तोकिएको छ। यदि तोकिएको संख्याभन्दा बढी प्रतिनिधि सहभागी हुन चाहन्छन् भने इवासको निर्णयसहित प्रतिनिधिको संख्या र नामावली पठाउन अनुरोध गरिएको छ। अतिथि, पर्यवेक्षक वा अन्य सहभागीहरूलाई सम्मेलन अवधिभर रहन कुनै रोकटोक गरिने छैन।
यस सम्मेलनमा रूङमाहाङ वंशको गौरवमय इतिहासमा सुनौलो इँटा थप्ने महानुभावहरूलाई सम्मान गरिनेछ। जसले सामाजिक, राजनैतिक, शैक्षिक, व्यवसायिक, निजामति कर्मचारी, खेलकुद आदि कुनै पनि क्षेत्रमा उल्लेखनीय योगदान गरेका छन्, तिनीहरूको व्यक्तिगत विवरण इवासको निर्णयसहित पठाउन अनुरोध गरिएको छ।
किरात बान्तावा रूङमाहाङ राई वात्तोङ कार्यसमिति युकेबाट अध्यक्ष बिनोद कुमार राई र सल्लाहाकार छेत्राकला राई कार्यक्रममा सहभागी हुनुहुने छ।
सम्मेलनलाई सफल बनाउन देश विदेशमा रहनुभएका बंशहरूलाई आर्थिक सहयोग गर्न अनुरोध गरिएको छ। सहयोग रकम आर्थिक विभाग संयोजक एवं केन्द्रीय कोषाध्यक्ष श्री मुगा बान्तावालाई सम्पर्क गर्न वा Gurkhas Finance Ltd., धरान शाखा, खाता नं. 00401400129233000001 मा जम्मा गर्न सकिनेछ।
सम्मेलनका संयोजक किरात बान्तावा रूङमाहाङ राई केन्द्रीय वात्तोङ कार्यसमिति (केवास) का अध्यक्ष रबि कुमार राईले यस सम्मेलनलाई ऐतिहासिक बनाउन सबै बंश, छोरीचेली र जुवाईं, चेला, भानाभान्जीको सहयोग र सहभागिताको अपेक्षा गर्नुभएको छ। कुनै जानकारी वा सुझाव सल्लाहका निम्ति आयोजक समितिलाई सम्पर्क गर्न सकिने छ।
तयारी बैठकका निम्ति कार्यक्रम संयोजक केन्द्रीय कार्यसमितिका अध्यक्ष र महासचिव कार्यक्रम स्थल बसाहा पुगिसक्नु भएको र बैठक पश्चात कार्यक्रम स्थलको तयारी शुरु गरिने महासचिव सुनिल रुङमाहाङ राईले जानकारी दिनु भएको छ।
– भुमिराज राई
