रौतहट, रौतहटमा कारले मोटरसाइकललाई ठक्कर दिँदा बाबुछोरीको ज्यान गएको छ। चन्द्रपुर नगरपालिका–४ स्थित पूर्वपश्चिम लोकमार्गमा भएको यस दुर्घटनामा गरुडा निवासी ६० वर्षीय बलिराम सहनी र उनकी ४० वर्षीया छोरी उर्मिला देवी सहनीको मृत्यु भएको प्रहरीले जनाएको छ।
बिहान सवा ६ बजे हेटौँडाबाट चन्द्रपुरतर्फ आउँदै गरेको बा. ६ च. ३५२६ नम्बरको कारले निजगढतर्फ जाँदै गरेको ना. ३ प. ९५१२ नम्बरको मोटरसाइकललाई ठक्कर दिएको थियो। दुर्घटनामा बलिराम सहनीको दाहिने खुट्टा, ढाड र अण्डकोषमा गम्भीर चोट लागी स्थानीय हाइवे ट्रमा सेन्टर अस्पतालमा उपचारको क्रममा मृत्यु भएको छ।
उर्मिला देवीको दाहिने हात र ढाडमा गम्भीर चोट लागेको थियो। स्थानीय अस्पतालमा प्रारम्भिक उपचारपछि एलएस न्युरो अस्पताल बारा रेफर गरिएकोमा बिहान ९ बजे उपचारकै क्रममा उनको पनि मृत्यु भएको हो।
प्रहरीले हेटौँडा उपमहानगरपालिका १२ निवासी ४३ वर्षीय कार चालक कुमार पोख्रेललाई नियन्त्रणमा लिई अनुसन्धान गरिरहेको इलाका प्रहरी कार्यालय चन्द्रनिगाहपुरले जनाएको छ।
