पोखरा । सहारा क्लब हङकङका सल्लाहकार दुधजङ्ग गुरुङले सूर्यबहादुर केसी स्मृति सहारा आवासीय फुटबल एकेडेमीमा २० हजार नगद सहयोग गरेका छन्।
पोखराको माटेपानी घर भई हाल रोजगारी सिलसिलामा हङकङ बसोबास गर्दै आएका उनले एकेडेमी संयोजक विष्णु गुरुङलाई सो रकम हस्तान्तरण गरेका हुन् । साथै, उनले एकेडेमीका बालकहरूलाई फलफूलसमेत प्रदान गरे ।
यसैबीच, सहारा क्लब पोखराले एकेडेमी सहयोग सञ्चालनार्थ गरेको च्यारिटी डिनर नाइटमा समेत उनले १० हजार सहयोग गरेका थिए । क्लबको उद्देश्यप्रति प्रभावित भएर गुरुङले आगामी दिनमा पनि सहयोग निरन्तरता दिने आश्वासन दिएका छन् ।
सहारा क्लब पोखराका पूर्व उपाध्यक्ष एवं सहारा क्लब हङकङका संस्थापक अध्यक्ष दीपक गुरुङले समन्वय गरेको सो कार्यक्रममा सहयोगदातालाई वरिष्ठ उपाध्यक्ष पूर्णबहादुर गुरुङ, उपाध्यक्ष बिनु राना मगर र एकेडेमी संयोजक विष्णु गुरुङले संयुक्त रूपमा फूलगुच्छा र खादा लगाएर स्वागत गरेका थिए ।
वरिष्ठ उपाध्यक्ष पूर्णबहादुर गुरुङले सहयोगदाता एवं समन्वयकर्ताप्रति धन्यवादसहित हार्दिक आभार व्यक्त गर्दै भविष्यमा पनि सहयोगी हात बढाउन अनुरोध गरे ।
सो अवसरमा कोषाध्यक्ष लीलाबहादुर थापा, कार्यसमिति सदस्यहरू अमरबहादुर राजभण्डारी, ज्योति केसी, विजय गुरुङ, शैलेश गुरुङ, पूर्व कार्यसमिति सदस्य रविन श्रेष्ठको उपस्थिति थियो । जाँदाजाँदै दुधजङ्ग गुरुङ र दीपक गुरुङले एकेडेमीका ३ जना कर्मचारीलाई प्रोत्साहनस्वरूप जनही १ हजार सहयोग गरे ।
कार्यक्रम सञ्चालन क्लबका महासचिव गङ्गाराज पौडेलले गरेका थिए ।
सहारा क्लब पोखराद्वारा पोखरा–१७, दोबिल्ल्लामा सञ्चालित एकेडेमीमा हाल ३० जना बालकहरू आश्रित छन् ।
