काठमाडौं — जनआस्था साप्ताहिकका सञ्चालक तथा प्रधान सम्पादक किशोर श्रेष्ठ पक्राउ परेपछि पत्रकार तथा सञ्चारकर्मीहरूले विरोध जनाएका छन्।
श्रेष्ठलाई प्रहरीले पक्राउ गरेको विरोधमा काठमाडौंको भद्रकालीस्थित प्रहरी परिसरबाहिर पत्रकारहरू भेला भएर तत्काल रिहाइको माग गरेका छन्।
श्रेष्ठलाई पक्राउ गरिएको विषयलाई लिएर पत्रकार महासंघ तथा सञ्चारकर्मीहरूले प्रेस तथा अभिव्यक्ति स्वतन्त्रताको रक्षा गर्नुपर्ने भन्दै आपत्ति जनाएका छन्। प्रदर्शनका क्रममा प्रहरी परिसरमा पत्रकार र प्रहरीबीच केही समय धक्कामुक्कीको अवस्था सिर्जना भएको छ।
प्रदर्शनकारीहरूले पत्रकारलाई पक्राउ गरेर प्रेस तथा अभिव्यक्ति स्वतन्त्रता कुण्ठित गर्न नहुने भन्दै नाराबाजी गरेका थिए। उनीहरूले श्रेष्ठलाई तत्काल रिहा गर्न माग गर्दै सरकारको कदमप्रति असन्तुष्टि व्यक्त गरेका छन्।
पत्रकारहरूले सञ्चारकर्मीमाथि हुने कुनै पनि प्रकारको धरपकड र दबाब स्वीकार्य नहुने भन्दै प्रेस स्वतन्त्रताको सुनिश्चितता गर्न सरकारसँग माग गरेका छन्।
प्रदर्शनका क्रममा केही सहभागीले गृहमन्त्रीको राजीनामासमेत माग गरेका छन्। घटनालाई लिएर पत्रकार समुदायमा थप आक्रोश बढेको छ भने श्रेष्ठको पक्राउ र त्यसपछिको घटनाबारे विभिन्न पक्षबाट प्रतिक्रिया आउने क्रम जारी छ।
प्रेस स्वतन्त्रता र पत्रकारको सुरक्षा सुनिश्चित गर्नुपर्ने मागसहित प्रदर्शन जारी रहेको छ।
